JONJI BUEK NOGORI

 PETUAH ADAT JONJI BUEK NOGORI

Oleh: Datuk Seri Pebri Mahmud

Tak kalo nogori kan dibuek
Tobiang kan ditingkek
Rimbo kan ditobang
Rumpuik kan dilayu
Tanah kan dilambang
Jonji buek lah sudah dahulunyo

Nan godang jangan malendo
Nan tenggi jangan malangkahi
Nan diate jangan maompok
Nan lowe jangan manyawok
Nan panjang jangan malilik
Nan ketek jangan maupek
Nan rondah jangan bajingkek
Anak manuruik suku ibu
Sumpah sotiah kan namonyo

SYARAT  BERDIRINYA SEBUAH NOGORI

Tak kalo nogori kan dibuek,
Banjar kan dihuni
Ado tanah parumahan
Ado tanah pakandangan
Ado sawah paladangan
Ado sungai pengairan
Ado pondam pakuburan
Ado padang panjomuran
Ado rimbo panobangan
Ado rimbo nan balarangan

Koto baparompek suduik
Tiok suduik bori basuku
Tiok suku bori ba Penghulu
Nan bamonti badubalang
Nan tobang bakopak jo baridai
Bakato bonar menghukum adil
Bajalan di nan torang
Mamakan nan halal
Suri tauladan dek rang banyak

Banjar bori batuo
Rumah bori batungganai
Nan bahalaman babondar ayir
Balai baradat, topian babaso

Nogori basurau bamasojik
Nan bamalin, basuluah bendang

JENIS -JENIS PEMANGKU ADAT
1. Penghulu
Pucuk jalo himpunan ikan
Nan bak kayu godang ditongah koto
Batangnyo godang dahannyo kokoh
Ureknyo tompek baselo
Batangnyo tompek basandar
Dahan tompek bagantuang
Daun rimbun tompek balinduang kapanasan
Tompek batoduah kahujanan

Nan tinggi tampak jauah
Nan godang jolong basuo
Kok poi tompek bahobar
Kok datang tompek babarito
Nan tau di eriang dengan gendiang
Tau jo bayang kato sampai
Tau di dahan kan maompok
Tau di rantiang kan mancucuak
Badado lapang ba alam lebar

Nan mamocik dan mamogang
Pocik nan bisa malopean
Pogang nan tak bisa maaliahkan
Kok gosak nan kan mangipeh
Kok salah nan kan manimbang

Lebar nan kan mandidi
Panjang nan kan mangorek
Sentiang nan kan mambilai
Sumbiang nan kan manitik
Nan tau dibari nan tabontang
Tau dirakuak kayu nan bahuni
Pasak kungkuang dalam nogori

2. Monti

Monti nan arif bijaksano
Pandai bamain silek lidah
Paule jari panyambuang lidah dek penghulu
Pandai manenggang di nan sompik
Pandai mandongar elok bunyi
Pandai mamandang elok rupo

3. Dubalang

Dubalang pamagar nogori
Manjago adat jangan rusak
Manjago nogori jangan binaso
Kok lunak nan kan manyudu
Kok kore nan kan manakiak
Kok cokak nan kan marorai

4. Malin

Manjago adat nan bakalingkunan
Manogakkan syarak nan babilangan

5. Tuo Banjar / Tuo Kampuang

Nan kan manganono siang jo malam
Siang nan kan manengok-nengokkan
Malam nan kan mandongar-dongarkan
Ujuang tombak dek penghulu

6. Mamak / Tungganai

Mamak nan barumpun
Barumpun jo babatang
Nan babuah batandan jo basikek
Bamamak balantak tumang
Babari tanah barakuak kayu
Suri nan indak kabur
Bari nan indak lipur
Kan comin dek nan kudian

7. Suluah Bendang

Suluah bendang dalam nogori
Palito nan tak kunjuang padam
Nan mampabanyak sumur tompek minum
Nan mampagodang topian tompek mandi
Taat jo budi jadi sasaran